බර්ඩි

අනේ Birdie ඔයා මොන තරම් අසරණ පුංචි කෙල්ලක්ද? රැවටීම්වලට ලක් වූවත් මෙතරම් රැවටීමකට ලක්වූ අයෙක් ගැන මට මේ ජීවිතය තුළ මෙතුවක් නම් හමුව නැත. ඔබගේ මුළු දිවියම එකම එක ලොකු රැවටීමක්ව තිබියදී ඔබ සොයාගත් සත්‍ය ප්‍රේමය විඳින්නට ඔබට හැකි වූයේ කෙතරම් සුළු කාලයක්ද? ඔබට සැබැවින්ම ආදරය කළ, ඔබව ආරක්‍ෂා කිරීමටම ඔබව මරු තුරුලට යැවූ අය මොන තරම් නම් ඒ වග වැටහුන විට කම්පනයට පත්වන්නට ඇද්ද. ඔබගේ අන්දරය අකුරු හරහා මොළයට යද්දී පපුවේ ඇති වූ හිර කිරීම සහ වේදනාව, ඔබට දැනුනේ හැඟුනේ කෙසේදැයි විස්මිතව කල්පනා කරමින් හදවත බර කළේය. බර්ඩි මෙය කාගේ හෝ සත්‍ය කතාවක අතුරු කතාවක් විය නොහැකි නොවිය හැකිය.

Kate Morton විසින් රචිත The Clockmaker’s Daughter කෘතියේ අසංක්‍ෂිප්ත සිංහල පරිවර්තනය

දහනවවෙනි සියවසේ එක් හේමන්තයක, කුඩා දැරියකව ලන්ඩනයේ පටු වීදීවලදී අත්හැර දමා යන ලදී. අබිරහස් ආගන්තුකයකු විසින් හදා වඩා ගන්නා මෙම දැරිය පිළිවෙළින් සෙරක්, යෙහෙළියක්, අනුප්‍රාණ නිධියක් සහ පෙම්වතියක් වන්නීය. ඉක්බිති, 1862 වසරේ ගිම්හානයේදී, ඇගේ දහඅටවෙනි උපන් දිනය පසුව නොබෝ දිනකින්ම, ඕ සිත්තරුන් පිරිසක් සමග ඉහළ තේම්ස් නදියේ නිසල ගංගා දඟරයක පිහිටි සුන්දර නිවෙසකට විවේක සුව විඳීම පිණිස යන්නීය… සිත්වල කලබලය, නොඉවසුම් බව ඉහළ යයි. එක් ග්‍රීෂ්මාධික සැන්දෑවක වෙඩි පහරක හඬ අවට ගිගුම් දෙයි. කාන්තාවක් මරණයට ලක් වේ, තවත් කතක් අතුරුදහන් වෙයි. එහි සැබැවින්ම සිදු වූ දේ පිළිබඳ සත්‍යය කාලයත් සමග සැඟව යයි.
ඉන්පසු එළඹෙන සියවස සහ එයටත් පසු කාලයේදී, බර්ච්වුඩ් මන්දිරය බොහෝ අමුත්තන් පිළිගනී. එහෙත්, එය තම රහස ආරක්‍ෂා කර ගනී-. වෙනත් යුවතියක් ඇගේ පවුලේ රහසක් හේතුවෙන් මෙම නිවහනට ආකර්ෂණය වෙන තුරුම නිවහන එසේ හැසිරෙයි…
‘බර්ඩි’හි අබිරහස හෙළිරදවු වීම ඇරඹීමත් සමග 1862 වසරේ අර ශාපලත් දිනයේ පටන් බර්ච්වුඩ් මන්දිරයට පැමිණි අයගේ කතන්දර අපට දැන ගැනීමට ලැබේ. සංකීර්ණ ස්තරවලට සකස් කළ, භාවාතිශය බව උපරිමයෙන් තිබෙන මෙම කතාව සමහර වේලාවට, ඉදිරියට යෑමට ඇති එකම මාර්ගය වැටී ඇත්තේ අතීතය හරහා බව පෙන්වා දෙයි.