දික්කන්ද වලව්ව

ඔහුගේ මනස යකාගේ කම්මලක් මෙන් කැළඹී පපුව ‘ඩග්-ඩග්’ යන අනුකරණයෙන් ගැහෙන්නට විය. තව මොහොතකුදු පමා නොවූ ඔහු පහත මාලයට යන පඩිපෙළ දිගේ දිව යන්නට වූයේය. පඩි පෙළ කෙළවර මිදුලට බැසීම සඳහා වූ දොරටුව වසා තිබූ නමුත් එහි හරහාට යොදා තිබූ ඉබි යතුරු හොඳින් යොදා නොතිබුණි . සපුමල් ඇසිල්ලකින් දොරටුව විවෘත කරගෙන මිදුලට බටුයේය. ඔහුගේ හදවත දියෙන් ගොඩගත් මාළුවකු මෙන් ගැහෙමින් තිබුණි . ඔහු අඩියට දෙකට මිදුල හරහා දිව ගොස් ඔස්වල්ඩ් නිදා සිටි ඉහල මාලය පෙනෙන ප්‍රදේශය වෙත ළඟා වූයේය. ඔහුට වැඩි දුරක් එසේ දිව යාමට සිදුවූයේ නැත. එක්වරම ඉදිරියේ දුටු දර්ශනයකින් භීතියෙන් ඇලලී ගිය සපුමල් දෑස් අයාගෙන හුන් තැනම ගල් ගැසුණේය .