ලංකාවේ සංග්‍රාමය

අමිෂ් ති‍්‍රපති ලොව පුරා ඉමහත් ජනප‍්‍රියත්වයක් ලැබුවේ ඉන්දීය උපමහද්වීපය ඇතුළත පමණක් පිටපත් ලක්‍ෂ පනස්පහකට වඩා අලෙවි වූ සිංහල, දෙමළ, තෙළිඟු, බෙංගාලි වැනි ආසියානු භාෂාවනට පමණක් නොව ස්පාඤ්ඤ, පෘතුගීසි, පෝලන්ත හා ප‍්‍රංශ වැනි යුරෝපීය භාෂාවනට පවා පරිවර්තනය වූ ‘ශිව’ නවකතා ති‍්‍රත්වය හරහා ය.

2015 වසරේ ජූනි මස නිකුත් වූ ‘රාම; ඉක්ෂ්වාකු අංකුරය’ කෘතියෙන් ඔහු ගේ රාම-චන්ද්‍ර පොත් පෙළ ඇරැුඹිණි. භාරතීය මහා කාව්‍යයක් වූ වාල්මිකී ගේ ‘රාමායනය’ වෙත නව අර්ථයක් ලබා දෙමින්, එහි මිථ්‍යාමය පසුබිමින් මිදීගත් එම පොත් පෙළේ දෙවැන්න වූයේ ‘සීතා; මිථිලාවේ රණශූරිය’ යි. රාම, සීතා හා රාවණ යන ප‍්‍රධාන චරිතයන්ට පමණක් නොව අනෙකුත් අවශේෂ චරිතයන්ට සහ මහාකාව්‍යයේ එන කතා පුවතට පවා සිය පරිකල්පනය ඔස්සේ අපූර්ව හැඩතල ලබාදුන් අමිෂ් ගේ ‘රාම-චන්ද්‍ර පොත් පෙළේ තෙවැන්න වූයේ ‘රාවණ; ආර්යවර්ත හි සතුරා’ ය. එහි සිවුවැන්න පාඨකයන් වෙත ලබාදෙන්නට අමිෂ් යම් කාලයක් ලබාගත් බව සත්‍යයකි. එය ‘වෝ ඔෆ් ලංකා’ යන නමින් නිකුත් වූයේ 2022 වසරේ ඔක්තෝබරයේ ය. ඒ මුළු ලොවම අඩපණ කළ කොවිඞ් වසංගතය බොහෝ දුරට මර්දනය වී පසුබැස යාමෙන් අනතුරුව ය.

දැන් අමිෂ් ගේ රාම-චන්ද්‍ර පොත්පෙළේ සිවුවැන්න ‘ලංකාවේ සංග‍්‍රාමය’ යන නමින් ඔබ අතට පත්ව අවසන් ය.

‘‘මට රාම, සීතා හා රාවණ යන චරිත දෙස පරිපූර්ණව හා ඓතිහාසික ලෙස දැකගන්නට අවශ්‍ය වූවා. ප‍්‍රායෝගිකව භාරතීයයන් බහුතරය රාම ගේ ‘රාම රාජ්‍ය’ යන සංකල්පයට බෙහෙවින් ගෞරව දක්වනවා. එහෙත් එම සංකල්පය මැනවින් නිරවද්‍ය ආකාරයෙන් හඳුනන්නේ කීයෙන් කී දෙනා ද යන්න මට නම් ගැටලූවක්. එහෙයින් ම උතුම් වූ රාම සමකාලීන සමාජය ගොඩනැංවූ ආකාරය ලියන්නට මට අවශ්‍ය වූවා. රාම යනු නීති අකුරටම පිළිපදිනු ලැබූ අයෙක්. මා සිතන්නේ නූතන ලෝකය පළමුව උගත යුතුව ඇත්තේ නීතීන්ට ගරු කිරීම බවයි’’ අමිෂ් සඳහන් කරයි.

නිසි ආකාරයෙන් නීතිය පවත්වාගෙන යාමට පාලකයන් මෙන් ම ජනතාව ද උනන්දු නොවීමේ අනිටු ඵලවිපාක හොඳින් ම අත්විඳි, තව දුරටත් අත්විඳිමින් සිටින රටක් ලෙස ශ‍්‍රී ලංකාව හැඳින්වීමේ වරදක් නැතැයි අපට සිතෙයි.

රාම; ඉක්ෂ්වාකු අංකුරය, සීතා; මිථිලාවේ රණශූරිය සහ රාවණ; ආර්යවර්ත හි සතුරා යන කෘතීන් කියැවූ පාඨකයන් මෙම පොත්පෙළේ සිවුවැන්න ‘ලංකාවේ සංග‍්‍රාමය’ තම අතට පත්වන තුරු නොඉවසිල්ලෙන් බලා සිටි බව අපට නොරහසකි. දැන් දයාබර, සහෘද පාඨක ඔබ ගේ මනදොල සපිරී අවසන් ය.