මෙලුහාවේ අමරණීයයෝ

ඉන්දියාවේ මහා රාෂ්ට‍්‍ර ප‍්‍රාන්තයේ මුම්බායි හි දී අමිෂ් ති‍්‍රපති උපත ලබා ඇත්තේ 1974 වසරේදී ය. උසස් අධ්‍යාපනය ලැබීමෙන් අනතුරුව වසර දාහතරක් තිස්සේ බැංකු නිලධාරියකු ලෙස කටයුතු කළ අමිෂ්ට එම වෘත්තියෙන් තෘප්තියක් නොලැබිණි. එහෙයින් ම ලේඛන කලාව වෙත සිත යොමු කළ හෙතෙම මහත් ලාලසාවක් දැක්වූයේ ඉතිහාසය, මිත්‍යා ප‍්‍රවාදාවලීන්, දර්ශනය වැනි විෂයයන් කෙරේ ය. ඒ සමග ම හෙතෙම ලෝකයේ බොහෝ ආගම්වල සුන්දරත්වය හා අර්ථය ද හැදෑරීමට යොමු වූයේ ය. එහි ප‍්‍රතිඵලයක් වූයේ හින්දු දේව පුරාණයන්ට නව අර්ථකථන එක්කරමින් ‘ශිව’ නවකතා ති‍්‍රත්වය ඔහු අතින් රචනා වීමයි.

භාරතයේ පමණක් නොව වෙනත් බොහෝ රටවල ද බැතිමතුන් ගේ ඉමහත් ගෞරවයට පාත‍්‍ර වූ ‘ශිව දෙවියන්’ ගේ චරිතය ඔහු සිය නවකතාවට පාදක කරගන්නා අමිෂ් පුරාණ කතා සියල්ලෙන් බැහැර වෙයි. ඔහු ගේ අදහස වන්නේ පසුකාලීනව දෙවියකු ලෙස ඉමහත් භක්තියට පාත‍්‍ර වන්නේ අතීතයේ සැබැවින් ම මෙලොව විසූ ශ්‍රේෂ්ඨ මිනිසකු බව ය. මෙම නවකතාව රචනයේ දී ඔහු විද්‍යාත්මක කාරණා සම්බන්ධයෙන් සාකච්ඡුා කරද්දී යොදා ගන්නේ වර්තමාන විද්‍යාවේ අපට හුරු පුරුදු වචනම ය. මිණුම් ඒකක සඳහා ද, උදාහරණ ලෙස දුර ප‍්‍රමාණයන් දැක්වීමේ දී ඔහු ‘යොදුන’ වැනි පැරැුණි මිණුම් ඒකක අමතක කොට මීටර හා කිලෝමීටර වශයෙන් වර්තමාන මිණුම් ඒකක ම දක්වයි.

වර්තමාන පාඨකයා වෙත කෘතිය වඩාත් සමීප කරවීම ඔහු ඉන් සමහර විට අදහස් කරන්නට ඇති අතර 2010 වසරේ දී මුලින් ම ප‍්‍රකාශයට පත් වූ ශිව ති‍්‍රත්වයේ පළමුවැන්න පාඨකයන් අතර ඉමහත් ජනප‍්‍රියත්වයක් ලැබුවේ ය. එහෙයින් ම එහි දෙවැන්න ‘ද සීක‍්‍රට් ඔෆ් නාගාස්’ 2011 වසරේදී ද, තෙවැන්න ‘දි ඕත් ඔෆ් ද වායු පුත‍්‍රස්’ 2013 වසරේදී ද නිකුත් වූයේ ය. මෙම කෘතීන් හරහා අමිෂ් ති‍්‍රපති කොතරම් ජනප‍්‍රිය වී ද යත් 2019 වසරේ දී ‘ඉන්ඩියා ටුඬේ’ සඟරාව වර්තමානයේ බලවත්ම ඉන්දියානුවන් පනස් දෙනා අතරට අමිෂ් ගේ නම ද ඇතුළත් කළේ ය.