ම’සිත් හසර

ම’සිත් හසර එක්තරා නුහුරුවක

A strangeness in my mind – Orhan Pamuk

Masith hasara ekthara nuhuruwaka

පරිවර්තනය – ගංගා නිරෝෂනී සුදුවැලිකන්ද – Ganga niroshani suduwelikanda

ප්‍රකාශනය : විදර්ශන ප්‍රකාශකයෝ – Vidarshana publishers

මේ, බෝසා සහ යෝගට් වෙළෙන්දකු වන මෙව්ලූත් කරතස්ගේ ජීවිතයේ සහ දවල් සිහිනවල කතාන්දරයයි.

1957 දී ආසියාවේ බටහිර ඉවුරේ, මධ්‍යම ඇනටෝලියාවේ සිනිඳු මීදුම් සහිත විලකට ඉහළින් පිහිටා ඇති දිළිඳු ගමක උපන් ඔහු, වයස අවුරුදු දොළහේදී ඉස්තාන්බුල් නගරයට පැමිණ, සිය ජීවිතයේ ඉතිරි කාලය පුරා ලෝකයේ අගනුවර වූ එහි ජීවත් විය.

විසිපස් හැවිරිදි වියේදී පෙරළා තමා උපන් පළාතට ගිය ඔහු එහිදී ගැමි කෙල්ලක සමග රහසින් පැන ආවේය. එය ඔහුගේ ජීවිතයේ ඉතිරි කාලය නිර්ණය කළ තරමක් අරුම කි‍්‍රයාවක් විය: ඈ සමග යළිත් ඉස්තාන්බුල්වලට විත් විවාහ වූ ඔහුට දියණියන් දෙදෙනකු ලැබිණි; ඔහු වීදියේ යෝගට්, අයිස්කී‍්‍රම් සහ බත් විකුණමින්ද, භෝජනාගාර සේවකයකු ලෙස රැකියාව කරමින්ද නැවතීමක් නැතිව කුලී වැඩ ගණනාවක නියැලූණේය; එහෙත්, සෑම සැන්දෑවකම, නොවරදවාම, ඔහු බෝසා විකුණමින් සහ අරුම සිහින දකිමින් ඉස්තාන්බුල්වල වීදි පුරා සැරිසැරුවේය.

2006 වසරේදී නොබෙල් සාහිත්‍ය ත්‍යාගයෙන් පිදුම් ලද, තුර්කි ජාතික ලේඛක ඔර්හාන් පමුක්ගේ කෘතීන් තුනක් වෙනුවෙන් ප්‍රකාශන අයිතිය හිමිව ඇති විදර්ශන ප්‍රකාශන ආයතනය ඉන් පළ කරන දෙවැනි කෘතිය ‘ම සිත් හසර එක්තරා නුහුරුවක’ ය. ඉන් පළමුවැන්න පසුගිය වසරේදී ඔහුගේ The Red Haired Women කෘතිය ‘රත් වරලැති ලිය’ නමින් නිලුක කදුරුගමුව ගේ පරිවර්තනයක් ලෙස එළිදුටු අතර, එය මේ වසරේ රාජ්‍ය සාහිත්‍ය සම්මාන උළෙලේ හොඳම පරිවර්තනය ලෙසින් සම්මානයට පාත්‍ර විය.